ភ្នំពេញ៖ មេធាវីការពារក្តីឱ្យលោក កឹម សុខា ជាអតីតប្រធានគណបក្សសង្គ្រោះជាតិ បានថ្លែងបញ្ជាក់ថា នាព្រឹកថ្ងៃទី១៩ ខែមករា ឆ្នាំ២០២២ លោកនឹងទៅចូលរួមសវនាការនៅឯសាលាដំបូងរាជធានីភ្នំពេញ ដែលជំនុំជម្រះលើសំណុំរឿងឃុបឃិតជាមួយបរទេសផ្តួលរំលំរដ្ឋាភិបាលស្របច្បាប់។

អ្នកស្រី ម៉េង សុភារី មេធាវីការពារក្តីឲ្យលោក កឹម សុខា បានថ្លែងបញ្ជាក់ប្រាប់អ្នកយកព័ត៌មាន EAC ថា លោក កឹម សុខា នឹងទៅចូលរួមសវនាការនាព្រឹកថ្ងៃទី១៩ ខែមករា ឆ្នាំ២០២២ តាមការគ្រោងទុក ក្រោយសវនាការកន្លងមកត្រូវបានលើកពេលជាច្រើនដងរួចមកហើយ ព្រោះមានការរីករាលដាលជំងឺកូវីដ-១៩។

សមាសភាពមន្ត្រីសំខាន់ៗចូលរួមក្នុងសវនាការថ្ងៃស្អែក រួមមានលោក កូយ សៅ ជាប្រធានក្រុមប្រឹក្សាជំនុំជម្រះ លោក សេង លាង និងលោក ធាម ច័ន្ទពិសិដ្ឋ ចៅក្រមប្រឹក្សា ឯលោក ប្លង់ សុផល ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ជាតំណាងអយ្យការអមសវនាការ និងលោក ជ័យ វាសនា ជាក្រឡាបញ្ជី។

ដូចគ្រាកន្លងមកដែរ អ្នកស្រី ម៉េង សុភារី ជាមេធាវីម្នាក់ក្នុងចំណោមមេធាវីផ្សេងទៀតដែលការពារក្ដីលោក កឹម សុខា នៅតែបង្ហាញពីក្តីរំពឹង ចង់ឃើញតុលាការទម្លាក់ចោលការចោទប្រកាន់មកលើកូនក្តីរបស់ខ្លួន។

សូមបញ្ជាក់ថា លោក កឹម សុខា ត្រូវបានសមត្ថកិច្ចចាប់ខ្លួនដោយចោទប្រកាន់ពីបទក្បត់ជាតិ កាលពីឆ្នាំ២០១៧។ បន្ទាប់មកនាអំឡុងឆ្នាំ២០១៩ តុលាការក៏បានសម្រេចអនុញ្ញាតឲ្យលោកអាចធ្វើដំណើរក្នុងប្រទេសបាន ប៉ុន្តែហាមធ្វើនយោបាយ និងចេញក្រៅប្រទេស៕